बैंकबाटै पैसा नपठाए फर्केर कोरिया जान पाइने छैन

1112

काठमाडौं । वैदेशिक रोजगारीका क्रममा कोरियामा हुनुहुन्छ ? कमाएको पैसा बैंकिङ च्यानलमार्फत घर पठाउनु भएको छैन भने फेरि फर्केर कोरिया जान पाइने छैन ।

सन् २०१८ जनवरी १ देखि पुनः श्रमस्वीकृति लिँदा बैंकबाट रकम पठाएको प्रमाण पेश गर्नुपर्ने भएको छ । यस्तो प्रमाण पेश गर्न नसक्ने व्यक्तिको श्रमस्विकृति जारी नहुने र वैदेशिक रोजगारीमा जान नसक्ने ईपीएस कोरिया शाखाले जनाएको छ ।

दक्षिण कोरियामा रोजगारी गरी फर्किएका कामदारले पुनःश्रमस्वीकृति लिँदा बैंकमार्फत पैसा पठाएको प्रमाण पेश गर्नुपर्ने भएको हो ।

पाँच वर्ष एउटै कम्पनीमा काम गरेर फर्केका प्रतिबद्ध कामदार, सीबीटी र पीबीटी परीक्षा दिएर पुनः कोरिया जान चाहनेहरूले यस्तो प्रमाणको जगेडा गर्नुपर्ने भएको छ ।

ईपीएस कोरिया शाखाले वैदेशिक रोजगारीमा गएका नेपालीले आर्जन गरेको रकम औपचारिक माध्यमबाट स्वदेश नपठाउँदा राष्ट्रिय अर्थतन्त्रमा समावेश हुन नसकेको उल्लेख गरेको छ ।

कामदारले कमाएको रकम औपचारिक माध्यमबाट घर पठाउँदा विदेशी मुद्रा राष्ट्रिय अर्थतन्त्रमा समावेश हुने, प्रेसित विप्रेषणको सुरक्षा हुने, विदेशी मुद्राको नियमनमा सघाउ पुग्ने र व्यक्तिको आर्जित रकम सुरक्षित हुने भएकाले कोरिया जाने नेपालीलाई आर्जन गरेको रकम बैंकिङ च्यानलबाट पठाउन इपीएस कोरिया शाखाले सूचित गरेको छ ।

LEAVE A REPLY

Please enter your comment!
Please enter your name here